14e mwa, waaaaa mersi Sanzman !

21 janvier 2025 08:18

Ne vous fiez pas au titre ! L’auteure vous emmène sur les routes de sa réflexion pour une nécessaire prise de conscience.

Fran-fran tou, mo pran mo klavie pou partaz mo ti lide ; mo pa tro kontan koze, blablate, siport ki parti tousala, me, maaaaannnn, sa 14e mwa la, tchoooouuuu, zafer la siper ! Premie fwa depi ki mo travay ek mo’nn gaygn zanfan ki mo pe pass enn zanvie trankil, san stres, san dinn minn apolo-dizef-sardinn mo pa kone kouma fwa par semenn. Enn soulazman papao ! Mo al mo ti sipermarse mo pran mo ti poul san gaygn traka, mo kwi mo ti manze, san gaygn sier frwad! Parski avek la rantre, poss vid. Avek bann depans koumansman lane, poss defonse. Me la mo trankil, mo pe apresie. Mo pe plane (me pa tro !).

Si saler ti kapav al kasiet, si bann marsan lamor dan kwin sime ti kapav al perdi, si rasism anver bann krepi kouma mwa ti kapav disparet, si mo ti kapav gaygn, mwa ek mo zanfan, mem sans ki tou dimounn, mo ti vremem viv lor enn tizil paradi !

Kart postal la top, non ? Me mo bizin al pli lwin, kantmem! Sori, pa kapav ress lor tikoton mem. Lavi pa si douss, bizin aksepte. Parski si pa ti ena sa 14e mwa-la, ki ti pou arive ? Mo bizin depann enn promes elektoral bien bankal pou ki mo kapav roul mo lakwizinn san problem. Pourtan mo pa grate-santi, mwa. Mo lev sinker dimatin tou le gramatin, mo okip zanfan, mo pran mo tibis, mo al travay. Tou le zour ; mo pa fer lindi kordonie, mo pa fer mardi-mason, mo pa oz merkredi-lanfle ! Mo enn dimounn ki kontan travay, anfin, se pa vre (si ti kapav ABC mo pa ti pou dir non) ; mo respekte valer mo travay, mo konsian ki pou donn enn zoli lavi mo lafami mo bizin rinte. Mo pena backing, mo pa enn ti kopinn, mo pa’nn roul avek okenn parti, mo pa inn al kol lafis, mett bandrol, plass kess savon, mo pa inn al danse dan meeting, mwa ! Mo enn simp fam ki anvi viv enn legzistans ki ena sans.

Tousala pou dir ki mo travay dir ek ki mo pe bizin enn 14e mwa pou santi mwa respire finansierman. Ena enn problem ladan non ? Sirtou kan mo pe dir respire, mo pa dir mo pe al bel-bel restoran, mo pa pe al lotel ar mo fami, mo pa pe poste mwa lor Instagram avek enn mari boutey. Non, mo pe respire, parski mo pe koupe-transe, parski mo pe trase, mo pe respire pou lesansiel. Ou imazinn sa ? Alor ki Prezidan mo pei pe dir bann vie etranze vinn pran zot retret dan MO pei, ar zot gro kass. Bann dimounn pe koz zantrifikasion boukou anse moman. Mo bizin avwe mo pa ti kone, di tou, ki savedir. Me monn al tcheke. Monn al ouver mo lespri. Mo partaz enn definition sinp ar zot : «Processus par lequel la population d'un quartier populaire fait place à une couche sociale plus aisée.»

Ou konpran konsept la. Zot pou fou nou deor pour mett sa bann dimounn ki ena bel kas ! Alor ou pa krwar zot pe bouss nou lizie ar sa 14e mwa, la ? Alor ki derier nou ledo, zot pe kokin nou bann drwa fondamanto. Alor fami ! Ou kapav mari kontan ounn gaygn 14e mwa, me pa blie bann zafer pli importan. Eski ou, ou bann zanfan, pou resi aste later dan Moris, kann dimounn riss pe vinn depi deor avek zot gro kas sek zot pe mont pri later ? Eski enne 14e mwa li sifi pou fer enn lane komision, pay enn lane faktir ? Eski ou bann zanfan pou santi zot diferan parski zot ledikasion pa pou ousi spesial ki bann zanfan ki al dan tou sa bann lekol prive la ? Eski, a nou al pli lwin, nou asire ki ledikasion ki pe done dan lekol piblik li o nivo si tou bann profesionel mari top, mari kalifie, pe zis al dan lekol prive ? Zot pe «devlop» nou pei ek nou, nou pe perdi partou.

Kifer bann sipermarse, bann magazin pou bess zot bann pri, fer promosion, maximiz konpetision pou ki bann Morisien gagnan ? Kan ena bann dimounn ki ena bel bel kass ek zot kapav pey tou. Dan sa sistem la, mazorite la pa konte, non? Se ziss sa bann ki ena, ki konte. Nou, nou bizin adapte nou a enn lemond ki fer pou zot, alor ki dan lekontrer nou, laklas travayer, ki pli nombre. Ena enn problem la ? Ena enn kestionma ki pe bizin fer, la ? Ou pa krwar ? Mwa kan mo asize, mo mazinn tousala, mo gaygn sok kan mo realize dan ki pei nou pe viv. Mo dekouraze. Mo anvi less la koler pran tou plas. Apre ou kone ki mo al fer, mo al lir, mo al aprann, pou say konpran ki bann defi ki mo bizin fer fas. Kitfwa nou’nn blie li, me ledikasion (pa forseman an term lekol) lor seki pe arive ek seki inn ariv nou, li importan pou nou ek pou transmet a nou bann zanfan! Lerla zot kone ki pou bizin reponn kan insilte zot, kan zot fer fas a bann diskriminasion, kan dimunn mank zot di respe.

A nou aret servi lakoler ek laviolans pou fer fas, nou servi nou lintelizans, nou reflexion, plito, non ? Tousala kapav amenn bann aksion, bann priz de pozision. Nou kapav vinn sa lopozision ki manke dan sa pei-la ! Parski waaaaaa nou’nn vot Sanzman, me sa ve pa dir ki nou oblize bwar dilo dir wi. Waaaaaa, nou kontan nou 14e mwa sa pe soulaz nou terib, me sa pa ve dir ki nou pa pou galere en 2025 si pri manze pa bese, si nou bann kondision travay pa vinn meyer, si nou bann saler pa ogmante. Ou pa kapav kasiet la realite ar biye, sof si ou ena mari boukou, pa blie la realite li toultan trouv enn sime pou rapel ou ki li la ek ki li pou kraz ou. Alor waaaaa mersi Sanzman, mari top. Drese ! Me se pa enn 14e mwa ki pe sanz nou lavi.

Pa krwar sa !

STEPHANIE