Zourne Internasional Lang Maternel : enn pake aktivite

Sa 21 fevrye-la, lemond pe selebre Zourne Internasional Lang Maternel, ek isi, plizir lasosiasion, linion ek kolektif pe fer bann aktivite pou selebre lalang kreol morisien.

Ala enn ti pe seki pou deroule :

Zordi dan liniversite Moris, Réduit apartir 9h30

Creole Speaking Union, dan kad sa la zourne-la, pe fer ene atelie travay lor enn proze resers dan so New Academic Complex, lor tem Promoting Institutional Democracy through Language Access in Kreol Repiblik Moris and Digital Innovation.

Chief Guest pou sa evenman-la pou Speaker Lasanble national Shirin Aumeeruddy-Cziffra. Rajen Narsinghen, Junior Minister pour Zafer etranzer, pou osi prezan.

Dan sant Abaim, samdi 22 fevrie

Group ABAIM pe konsakre tou la zourne samdi pou diskit lor lalang maternel ek so linportans. Apartir 11 zer, pou ena bane abitiel Akonpagnman Skoler, Lekol Lamizik, etc, me osi enn dezene, animasion mizikal ek plizier diskision lor sa size-la.

Zourne Mondial Langaz Maternel par l’Atelier Pierre Poivre, Café du Vieux Conseil, Samdi 22 fevrye (10 zer ziska 4 er tanto), lantre gratis

Sane-la pou pli festif ek ouver pou tou dimounn ! Rende-vou depi 10er dan Café du Vieux Conseil, Port-Louis, pou ene lazourne animasion ek aktivite, organize ek prezente par l’Atelier Pierre Poivre.

Dan program-la :

Pou ena lavant liv bann oter kouman Shenaz Patel, Loga Virahsawmy, Alain Fanchon, Tenusha Jundoosing, Cyril Luximon ek Creole Speaking Union

Pou ena plizir tab ronn dan program-la

Pou ena Teat Lobze ek Maryonet par l’Atelier Pierre Poivre, ki pou prezant nou trwa kreasion : Zistwar Lilet ek Gaspar, Larivier Mous ek Liev ek torti

Nicolas Frichot ek so bann slammers pou an plas !