Mama

20 juin 2025 17:55

L’auteur partage un poème-hommage à sa maman et à toutes les mamans. Une pensée affectueuse inspirée par la fête des Mères.

Ena ki dir li Ma, ena ki dir li Mami,

Ena ki apel li Amma, ena ki dir li Ammi

Ena enn ta fason pou apel nou Mama

Me li tousel kone tou seki li fer pou nou sak zour.

Sak gramatin li leve, mem avan so lekor pre,

Ziska tanto li lor so lipie

Toultan pe fer seki bizin,

Toultan pe rod met so bann zanfan lor bon sime.

Mo dimann mwa: eski li gagn letan mem repoze?

Li for, pa par lavwa – me dan so silans,

Dan so koudme, dan so regar ki donn lespwar.

So leker kouma enn losean,

So lizie, kouma enn zardin ranpli ar fler.

To kapav gagn lape zis ar so prezans

Telman li dous, telman li ranpli ar lamour.

Si Bondie ti ena enn nom lor later...

Li ti pou apel Mama.

Me pa blie – ena zis enn sel Mama.

Bonn fet Mama.

Mo swet zot kouraz, bon lasante,

Ek kontinie beni mwa sak zour.

PAR ANJINSEN VALAMOOTOO