Maux sur mots : Trap to dignite, napa large

6 septembre 2025 13:44

Écrire, partager ses pensées, ses états d'âme, son quotidien... est important pour elle. C'est ce que nous dit Charlise Lepoigneur, qui a choisi de partager avec nous un de ses textes. «Mo pasion se ekrir. Ek fer li dan mo langaz maternel, se enn lot vibe. Mo anvi met lor papie seki mo leker kriye atraver "Maux sur Mots". Exprim mwa lor bann size ki tous mwa. Ki bles mwa. Ki inspir mwa. Ki fer mwa vibre. Mo espere zot apresie.»

Wi. Li’nn tronp twa. Non. Lavi pa aret la. Wi. Leker mari kase. Non. Li pa enn fatalite.

Nou tou kone ki tou dimal sikatrize! Nou tou kone, ki kan tonbe, kapav releve. Nou tou kone ki apre lapli, enn zoli larkasiel vini.

Abe kifer to pe deprime? Kifer to pe anvi swiside?

Kifer to pe bwar? Kifer to dan mare nwar?

Pou enn dimounn ki pa finn respekte twa? Pou enn dimounn ki pann ezite pou tegn to lazwa?

Eski li merite ki to aret viv pou li? Eski li merite ki to perdi tou akoz li? Frer, ser... Lavi li zoli.

Remont to prop kol ek avanse. Personn pa merit ki to deprime. Personn pa vo lapenn to strese. Ek ankor mwin to swiside.

Douler-la, mo promet, li pou pase. To pou rekoumans viv ek profite. To pou rekoumans riye ek amize.

Viv to lemosion si bizin. Plore, kriye si bizin. Tonbe, sote, pile si bizin.

Me asir twa ki kan to releve, To pa re-plore. To pa re-deprime. To pa re-efrondre.

Leve, respire. Leve, apresie.

Leve, avanse.

Lev to latet ek fierte. Ena pli bon divan, pa arete. Zordi li enn douler, Dime li pou enn souvenir.

*Zimaz ilistrasion zenere par AI

Par Charlise Lepoigneur