Mo pa ase for

25 juillet 2025 20:18

Cette enseignante en Kreol Morisien depuis 2012, friande de poésie, de déco et de justice sociale, s’est découvert une passion pour s’exprimer à travers des poèmes dans sa langue de prédilection sur des sujets d’actualité. Cette fois, elle nous propose un poème sur le brûlant sujet de la drogue…

Mo pa ase for? To panse mo antor? Oubien to krwar ki se sa mo sor? Me to kone, sans mo pankor mor!

Eski mo ti pe rod enn kalman? Eski mo ti plin ek mo lavi avan? Eski mo ti ena bann kamarad tantan? Mo pa kone kouman mo finn anfonse ladan

Mem mo paran ti ris ou mizer Zame zot finn fer fezer Finn toulezour priye segner Pou mo lasante ek mo boner

Me dan ki kalver mo finn rantre Kot mo pe bizin mandie Lekol finn met deor Dan travay zot dir zet to lekor

Mo finn vinn enn dimounn san leker Pakone mem si ena frer ser Fam zanfan finn perdi mwa Mo finn fer zot perdi zot twa

Kot mo gagne mo kokin Seki mo trouve pre ou lwin Kasiet dan pos Pou al donn gran bos

Se limem ki pou fourni par zour Par semenn, par mwa, toulezour Mo nepli kapav reste Yenn-la pli for, mo rode

Ti koumanse par sigaret Vinn fey, vinn bong Gagn nisa kan pike Kan Gout ero, santi mwa «highway» Aster tase net dan sinte

Anvi sorti, anvi fini Me zafer-la ris mwa ar li Li dir mwa vini Nou pankor fini

Me li pakone ki akoz li Mo nepli ena fami Mo pa kone ki ete dormi Mo zis dan nisa ek se sa mo lavi

Ena plin ankor Gran, tipti, vie, zenn Pe fini zot lekor Rest dan yenn

Nou pa finn rod sa nou Nou finn les nou inflianse Aster nou finn tase Ek pe bien trakase

Nou pa move nou Nou pe bizin led ek vit Okontrer priye pou nou Aret donn nou tit

Tir nou, ed zot ek mwa Nou anvi enn bon lalwa Sinon pou ena boukou dan prizon Pa krwar ki pou gagn kosion.. Silvouple rod enn solision

Ed nou!! Ed nou!!

Par Jenita Dindyal