Publicité
23 mai 2025 19:42
Il y a des rencontres qui restent à jamais gravées. Dans ce texte partagé par une personne qui a souhaité garder l'anonymat, il est justement question d'une rencontre inoubliable qui marque...
Mo plezir se ekrir. Pa lir. Pa ekoute.
Me zis met lor papie seki mo leker kriye.
Yer, mo’nn pans enn zanfan ki mo ti zwenn bien lontan, e so lexistans finn mark mwa.
E mo’nn anvi met sa parantez nou rankont la an-ekri, parski so zistwar ti boulvers mwa.
Nou pou apel li zoli garson. Li ti enn zenn adolesan alepok e li enn ti garson kouma lezot.
Li ti kontan zwe, galoupe, riye, manze...
E li ti bien kokas.
Me plis ankor, li ti ena enn lamour extrem pou so papa ek so tifrer.
Zoli garson ki, mem si li pa ti pli gran ki trwa pepin pom, ti ena enn lavi bien difisil.
Li’nn viv ek grandi omilie enn dram familial efroyab kot so mama ti viktim enn krim.
So papa finn remarye avek enn fam ki, plitar, pou vinn so pir kosmar : so bouro.
E se koum sa ki li finn aterir dan enn abri pou zanfan abize ek maltrete, e ki mo’nn fer so konesans.
Zoli garson ti osi ena enn siper-pouvwar : so lintelizans.
Malgre ladversite.
Malgre ki li finn perdi so mama dan manier pli orib ki ena.
Malgre ki li finn separe ek pilie so lavi : so papa.
E malgre ki li ti viv dan enn abri parmi bann zanfan ize, abize ek maltrete.
Li ti briye dan lekol.
Li ti sorti premie dan so vilaz pou enn lexame e finn mem gagn enn trofe pou sa.
Dan kolez, li ti pe gagn zis A ek B, mem si li pa ti pe kapav revize.
Zoli garson ti enn bon zanfan ki ti touletan souriyan.
So pozitivite ti inpresionan.
E li ti ena lespwar ki so papa pou vinn sers li.
Enn zour, li rant dan mo biro li kriye : “Miss! Miss! Mo papa pou vinn sers mwa».
Mo leker ranpli ar lazwa e mo ti larm koumans perle.
Anfin! So papa inn resi kit sa fam-la ek zoli garson e so tifrer pou resi viv ere.
Biensir, prosedir pran letan ek bizin atann.
Detrwa semenn plitar, enn lapel vinn boulvers ankor lavi sa malere-la.
Enn sinp lapel ki’nn baskil tou.
Zoli garson so papa finn desede.
Nou tou dan sa abri-la asize plore sa zour-la.
Ki kalite fardo sa zanfan-la pe bizin sarye ?
Kifer lavi inzis anver li ? Ki pese li finn fer ?
Azordi ankor, mo touzour pena repons-la.
Boukou lane finn pase san ki mo kone ki finn ariv sa bann zanfan ki mo ti zwenn laba e avek ki mo ti kre bann lien bien for.
Sakenn so zistwar ti boulvers mwa.
Sakenn so zistwar ti kouma enn kout pwaniar dan mo leker.
Kan papa zoli garson ti desede, mo ti pe sagrin ki mo pa ti ena ni laz ni lemwayen pou adopte li. Adopte zot tou. Donn zot enn sans dan lavi.
Zoli garson, ek so lintelizans, ti kapav vinn enn gran dimounn. Li ti ena kapasite. Li ti pou kapav fer bann gran zafer dan lavi.
Marye. Gagn piti. Rebatir so prop fami ki li finn perdi.
Ki kone ?
Me plizir lane plitar, mo pe lir 5-Plus. E mo trouv enn lartik lor li.
Li ti bizin ena 20-an par la.
Mo leker inn sezi. Sete enn fe-diver.
Mo larm inn koule ankor enn fwa. E sa gou amer linzistis la inn revinn dan mo pale.
Zoli garson finn swiside.
Miss
*Sa zimaz ilistrasion la zenere par AI
Publicité
Publicité
Publicité